Նրանք բոլորն իմ երեխաներն են՝ իմ նախկին խաղացողները․ Արբելոան իմ սիրելիներից է․ Ժոզե Մոուրինյուն՝ Ալվարո Արբելոայի մասին

«Բենֆիկայի» գլխավոր մարզիչ Ժոզե Մոուրինյուն ջերմ խոսքեր է ուղղել «Ռեալը» գլխավորող Ալվարո Արբելոայի հասցեին՝ նրան անվանելով իր ամենասիրելի սաներից մեկը։

​Վաղը Չեմպիոնների լիգայի լիգայի փուլի եզրափակիչ տուրում միմյանց դեմ կմրցեն Մադրիդի «Ռեալն» ու Լիսաբոնի «Բենֆիկան»։

​Հիշեցնենք, որ ավելի վաղ «արքայական ակումբի» նախկին մարզիչը զարմանք էր հայտնել, որ աշխարհի լավագույն ակումբները ղեկավարում են «առանց պատմության» մարզիչներ՝ որպես օրինակ բերելով Ալեգրիին («Միլան»), Գասպերինիին («Ռոմա») և Սպալետիին («Յուվենտուս»)։

Արբելոան զուսպ էր արձագանքել՝ նշելով․

«Երբ խոսում է նման մարզիչը, ես լսում եմ և վերլուծում։ Բոլորդ գիտեք, թե Մոուն ինձ համար ինչ նշանակություն ունի»։

​Այսօր պորտուգալացի մասնագետը հստակեցրել է իր դիրքորոշումը՝ խոսելով իսպանացու մասին.

​«Նրանք բոլորն իմ երեխաներն են՝ իմ նախկին խաղացողները։ Արբելոան իմ սիրելիներից է թե՛ մարդկային, թե՛ անձնական համակրանքի տեսանկյունից։

​Ալվարոն «Ռեալում» երբևէ հանդես եկած լավագույն մարդկանցից է։ Նա վերջինն էր, ում վրա կարելի էր ճնշում գործադրել։

​Դուք՝ լրագրողներդ, շատ խորամանկ եք ձեր աշխատանքում։ Ես պարզապես հույս ունեմ, որ նրա մոտ ամեն ինչ կստացվի, և նա ֆանտաստիկ կարիերա կունենա։

​Արբելոան կարող է մարզել աշխարհի ցանկացած թիմ, և ես նրան հաջողություն եմ մաղթում… բացի վաղվա խաղից (ծիծաղում է), դրանից հետո նա կարող է միշտ հաղթել։

​Մարզիչ լինելը շատ բարդ է, հիմնականում այն պատճառով, որ միշտ կգտնվի մեկը, ով կարծում է, թե քեզնից ավելին գիտի։ Ալվարոն, ով դեռ նոր է սկսում կարիերան, պետք է իսկապես սիրի այս աշխատանքը»,- պորտուգալացու խոսքն է մեջբերել A Bola-ն։