Պատգամավորի նկատմամբ ակտիվ բռնություն գործած 4 ոստիկանից միայն մեկի մասով կա պրոցես. պարզ է չէ՞, որ հետո ավելի լավ հաստիքի կտեղափոխեն. Աբրահամյան
- Armen Sukiasyan
- May 29, 2024
- 1 min read
ՀՀ ԱԺ պատգամավոր Տիգրան Աբրահամյանը գրում է․ «Ոստիկանությունը պատգամավոր Աշոտ Սիմոնյանի նկատմամբ ոստիկանների կազմակերպված հարձակմանն ի պատասխան ասում է, թե «նշանակվել է ծառայողական քննություն, ինչի արդյունքում դադարեցվել են ոստիկանության ծառայողի լիազորությունները»։
Նախ սկսենք այն հանգամանքից, որ տեսանյութերում ակտիվ գործող 4 ոստիկաններից միայն մեկի մասով կա պրոցես, այն էլ իրավիճակին, մեղմ ասած, ոչ համահունչ:
Մեծ բան են արել` լիազորություն կասեցրել: Պարզ է չէ՞, որ հետո կա´մ կվերականգնեն, կա՛մ այլ` ավելի լավ հաստիքի կտեղափոխեն:
Երկրորդ, ոստիկանությունը օրենքից դուրս է գործում` կոնկրետ քաղաքական հանձնարարություն կատարում:
Այստեղ խնդիրը ոչ միայն առանձին ստորաբաժանման ծառայողների, դրանց հրամանատարների անթույլատրելի վարքագիծն է, այլև ՆԳՆ բարձրագույն ղեկավարության:
Եվ եթե ՆԳՆ Սահմանադրությամբ և օրենքներով շարժվեր, ոչ միայն տասնյակներով քրեական վարույթներ կնախաձեռնվեր, այլ ղեկավար կազմը նվազագույնը կպաշտոնազրկվեր:
Բայց քանի որ սա փաշինյանական իրականությունն է, որտեղ ՆԳՆ խնդիրը բացառապես քաղաքական իշխանությանն ամեն գնով պաշտպանելն է, ապա որպես հետևանք կունենանք ապօրինի գործող ծառայողների պարգևատրումներ և պաշտոնի բարձրացումներ»:
